Heyrst hefur að hinum almenna íþróttaáhugamanni á Akureyri hafi fundist sem handboltakappinn Alfreð Gíslason væri vel að því kominn að fá í síðustu viku heiðursviður- kenningu íþróttaráðs Akureyrar og Afrekssjóðs Akureyrar. Alfreð fæddist á Akureyri 1959 og ólst þar upp. Hann hefur átt ríkan þátt í uppgangi handboltans þar í bæ og á Íslandi öllu. Undir stjórn Alfreðs náði KA sínum besta árangri; varð bikarmeistari í tvígang og Íslandsmeistari og deildarmeistari. Alfreð hefur frá árinu 1997 þjálfað í Þýskalandi og m.a. gert Magdeburg og Kiel að Þýskalands- og Evrópumeisturum. Auk þess sem honum hefur hlotnast fjöldi einstaklingsverð- launa sem bæði þjálfari og leikmaður. Alfreð þjálfar lið Kiel í dag og þykir einn sá færasti í sínu fagi…
Heyrst hefur að taugaspenna sé heldur í rénun vegna deilumálsins Dalsbrautar á Akureyri. Gatan var opnuð með viðhöfn í síðustu viku og fögnuðu margir. Reyndar fór það í taugarnar á sumum að látið væri eins og kominn væri sautjándi júní. Hefur heyrst að aldrei hafi áður verið farin „skrúðganga til að fagna lagningu vegarspotta á Akureyri“ eins og einn Akureyringur orðaði það. Hefur heyrst að and- stæðingar Dalsbrautar hafi litið svo á sem húllumhæið hafi verið „einn ein ögrunin frá Oddi Helga“ eins og einn KA-maður orðaði það…
Heyrst hefur að sumir Skagfirðingar séu með böggum hildar vegna umræðu sem orðið hefur um að KS hafi ægivald í héraði. Umræða kviknaði um þessi mál í kjölfar svartrar skýrslu um Íbúðalánasjóð og sérstök ítök KS við hið opinbera á fyrri tíma. Fyrrverandi bæjarstjóri á Húsavík, Reynhard Reynisson, er einn þeirra sem hafa tjáð sig um leiðara Akureyrar vikublaðs sem fjallaði um skýrsluna og eftirmál hennar í ummælakerfi á akv.is. Samkvæmt ummælum bæjarstjórans fyrrverandi má draga þá ályktun að margan Skagafjörðinn sé að finna á landinu eins og reyndar var einnig velt upp í leiðaranum…