Heyrst hefur að mikil ánægja sé með nýju ísbúðina sem hefur opnað í miðbænum á Akureyri þar sem Kaffi költ var síðast til húsa. Aðstandendur búðarinnar eru heppnir, því ísneysla Akureyringa mun hafa slegið öll met undanfarið, enda veðurblíða með eindæmum. Ekki kemur nýja búðin þó í veg fyrir að ísbúðin Brynja sé full út úr dyrum einnig. Heilbrigð samkeppni á ísmarkaði í hinu bjarta norðri…
Heyrst hefur að sæmdarhjónin Steinunn Sigríður Sigurðardóttir og Ingólfur Steinar Ingólfsson eigi gullbrúðkaup 23. júní næstkomandi. Faðir brúðarinnar, séra Sigurður Guðmundsson á Grenjaðarstað, síðar vígslubiskup á Hólum, gaf brúðhjónin saman en brúðguminn þurfti sérstakt leyfisbréf þar sem á er ritað: „Leyfisbréf handa Ingólfi Steinari Ingólfssyni til þess að mega kvænast unnustu sinni Steinunni Sigríði Sigurðardóttur, þótt hann hafi eigi náð lögmæltum hjúskaparaldri. Gjald kr. 150,oo.“
Steinunn Sigríður Sig- urðardóttir og Ingólfur Steinar Ingólfsson.
Hefur heyrst að heiðurshjónin haldi enga veislu vegna tímamótanna heldur kjósi þau fremur „listþvæling“ með Aðalheiði Eysteinsdóttur og Jóni Laxdal. Mikið stendur til hjá Aðalheiði um helgina þannig að dýnamík mun einkenna tímamótin.
Heyrst hefur að Davíð Kristinsson heilsugúru sé ánægður með Fabrikkuna á Akureyri. Hann ku hafa testað staðinn með því að panta sér 480 grömm af nautakjöti og sporðrenndi því öllu með bestu lyst. Hamborgarabrauðið lét Davíð hins vegar í friði, enda aðdáandi glútínlausra máltíða eins og hefur komið fram í pistlum Davíðs í Akureyri vikublaði.