Stjórn LungA skólans
Fyrsti lista lýðháskóli Íslands hefur verið stofnaður á Seyðisfirði. Skólinn nefnist LungA skólinn og er kenndur við LungA listahátíð ungs fólks á Austurlandi.
Á ný afstaðinni LungA hátíðinni á Seyðisfirði, kom stjórn LungA skólans saman í fyrsta skipti auk þess sem að opnað var fyrir umsóknir í fyrstu lotu LungA skólans sem er svokallað „BETA“ prógram og hefst 10. mars og lýkur 4. apríl 2014, en þar fá 20 nemendur samþjappaða útgáfu af námskrá skólans auk þess að fá tækifæri til þess að taka þátt í endanlegri mótun LungA Skólans.
Stjórn skólans skipa sex einstaklingar með breiðan bakgrunn og fjölbreytta hæfileika en hlutverk hennar er meðal annars að vera ráðgefandi í daglegu starfi, standa vörð um gildi skólans auk þess að móta og halda utan um stefnu stofnunarinnar. Eftirtaldir aðilar sitja í stjórn LungA skólans :
Dýri Jónsson (formaður), eigandi Hótel Öldunnar á Seyðisfirði og framkvæmdastjóri Vesturports
Guðmundur Oddur Magnússon (Goddur), grafískur hönnuður og prófessor við Listaháskóla Íslands
Sigrún Halla Unnarsdóttir, fatahönnuður og fyrrum LungA ráðs meðlimur
Nína Magnúsdóttir, myndlistakona, ein af stofnendum Sequenses myndlistarhátíðar, Kling og Bang og fyrrum stjórnarformaður Nýlistasafnsins
Ólafur Stefánsson, handboltamaður, þjálfari og heimspekingur
Margrét Pála Ólafsdóttir, uppeldis- og menntunarfræðingur og stofnandi Hjallastefnunar
„Það sem fær mig til þess að trúa á LungA Skólann er staðsetningin Seyðisfjörður. Ég get ekki ímyndað mér betri stað til þess að þroska heilbrigt sjálf og byggja upp það einstaka heldur en þá orkustöð sem fjörðurinn er. Að stilla upp skapandi hugsun fyrir það óorðna en mögulega í skel í fjallalíki með hugvekjandi perlu í botninum,“ segir Guðmundur Oddur.