Reykjahlíðarþorp. Mynd: Petr Brož
Ekki er rétt sem fram kom í Akureyri vikublaði í síðustu viku í frétt um Íbúðalánasjóð að hótelstjórinn í Reynihlíð hafi ætlað að kaupa hús í Reykjahlíðarþorpi til að selja þar gistingu. Hið rétta er að hótelstjórinn hafði hug á að leigja húsið út á almennum markaði.
„Reykjahlíðarþorp er íbúðahverfi og þar á ekki að stunda gistisölustarfsemi, þó svo að sumir komist reyndar upp með það, með genetískum frekjugangi. Það væri reyndar í þessu ljósi full ástæða fyrir Íbúðalánasjóð að gera könnun á því hvort eignir sem þeir fjármagna séu nýttar til atvinnustarsemi en þeim er óheimilt að fjármagna fjárfestingar sem notaðar eru til annars en eigin nota eða langtíma útleigu á almennum markaði. Mér er kunnugt um að það “íbúðarhúsnæði” í Mývatnssveit sem er til leigu á ferðamannamarki er allt fjármagnað af Íbúðalánasjóði,“ segir Pétur Snæbjörnsson hótelstjóri.
„Sem sagt Fasteignafélagið Reykjahlíð ehf hafði áhuga á að kaupa Brikihraun 5 af íbúðalánasjóði til að hafa eigina á leigu á almennum markaði, eins og reglur um fasteignafélög gera ráð fyrir og eru staðfestar af þáverandi Félagsmálaráðuneyti og Íbúðalánasjóði. Félagið hefur aldrei haft í hyggu að nota eignina til atvinnustarfsemi enda er því óheimilt að gera það samkvæmt nefndum starfs- og fjármögnunarskilmálum,“ segir Pétur.
